بعض النظريات الغريبة عن المسلسل الكرتوني "كوريدج الجبان"

اثناء البحث لقيت بعض النظريات الغريبة عن المسلسل الكرتوني "كوريدج الجبان" ، بتكلم عنها تحت هذي التغريدة :underage:.

هذا الكارتون يتكلم عن كلب اكرمكم الله اسمه "كوريدج" وهذا الكلب ملقب بالكلب الجبان لانه دائم يظهر وهو خائف من ابسط الاشياء وهدفه هو حماية العجوزين "مورييل" و "يوستاس" .

النظريه الاولى : الـ(skin walker)

Skin walker هو مخلوق مخيف ومزعج وكانت دائما تنتشر له قصص في ولاية New Mexico وهذا المخلوق بإمكانه التحول لاي شكل سواء حيوان او انسان وياخذ جميع صفاته . (ملاحظه : ما راح اقدر انزل صور للسكن والكر عشان صورهم البشعه ولكن هذا شكلهم التقريبي)

وكانت قصص هذا الحيوان تنتشر بين سكان امريكا الاصليين وقبائل النافاهو وكانو يقولون ان هذا الحيوان حقيقي ودائما يرتكب جرائم القتل لاسباب القوة والانتقام .

ولكن معظم قصصهم ما كانت عن القتل ، كانت عن مواقف مزعجه جدا ، بالعاده يشوفونه متشكل على هيئه حيوان او يسمعون اصوته في منتصف الليل .

وطبعا راح تستغرب وش علاقه كوردج الجبان بالـSkin Walker ، انتشرت صوره لبيت يشبه البيت الموجود في مسلسل كوريدج الجبان في ولاية New Mexico وبالتحديد في منطقة باسم (Truth Or Consequences)وتقدرون تلاحظون الشبه في الصورتين.

وطبعا البيت الموجود في New Mexico كان لزوجين كبار في السن ومعهم كلبهم وكانو دائما يواجهون امور غريبه ، وفي مرة من المرات اتصلو على الشرطه وابلغوهم بانهم رأو مخلوق ووصفوه بالـSkin Walker

ولما استلمت الشرطه البلاغ اختفى الزوجان تحت ظروف غامضة ولم يبقى الا الكلب.

وكانت منطقة (Truth Or Consequences) تحدث فيها جرائم جدا بشعة وبعض هذي الجرائم حصلت في البيت الي يشبه بيت كوريدج .

وكان في هذي المنطقه قاتل متسلسل اسمه "ديفيد باركر راي" ويلقب بـ(The Toy-box killer) وكان عدد ضحاياه بين ال 3-60 ضحية ، وكان معروف بانه يتنقل فهاذي المنطقه وينتقي البيوت الي تكون معزوله عن باقي البيت .

وهذا القاتل له طرق وخطط عشان يعتدي عالبيوت المعزوله ويخلي العوايل الي في البيوت يثقون فيه ويدخلونه بيوتهم ، وكان له 3 طرق .

الطريقه الاولى : كان يختلق قصه حزينه عشان يكسب عاطفة العائله.

الطريقه الثانية : يوعد العائله بانه يعطيهم فلوس او ربحوا جائزة مالية.

الطريقة الثالثة : قطع سلك التلفون من برا البيت ويقول لهم انه جاي عشان يصلحه.

ولما انعرف هذا المجرم في المنطقة طالبو السكان بالقبض على ديفيد باركر و وقتله لكن لما قبضو عليه ما قدروا يثبتون عليه اي تهمه بحكم انه ما كان فيه شهود وكانت قوة الشرطه في هذيك المنطقة جدا ضعيفه بحكم ان المنطقه صغيره.

وعشان كذا ربطوا سكان هذي المنطقه ديفيد باركر بالـSkin Walker عشان تشابه الصفات الي بينهم ، يقتلون البشر و يتربصون ويتجسسون عليهم ويستدرجون الضحايا.

ولو لاحظتم الثلاث طرق الي كان يستعملها ديفيد باركر لاستدراج الضحايا جميعها موجوده في مسلسل كوريدج الجبان وخصوصا كسب العاطفه بالقصص الحزينه او الوعود بالاموال .

النظرية الثانية : كوردج يتخيل جميع الوحوش ولا يوجد اي وحوش من الاصل هم مجرد بشر يزورون العجوزين ويدعم هذي النظريه هو تصرفات العجوزين بحيث انهم دائما يتقبلون هاذول الضيوف وما يخافون منهم الشخص الوحيد الي كان يخاف هو كوريدج.

النظرية الثالثة : كوردج والعجوزين عايشين في الجحيم استنتجت هذه النظرية بسبب ان المكان الي يعيش فيه العجوزين اسمه (The middle of nowhere) ومعناه المكان الضائع وما فيها اي شخص عايش في هذيك المنطقه غيرهم.

انتهى الثريد واعتذر عن الاطاله واتمنى انك تشرفني بمتابعتك لي وشكرا على القراءة .:heart::pray_tone1: