السياحة في Bayern/Germanyالإثنين 2 يناير - 11:56:17

السياحة في Bayern/Germany At165702115581161

السلام عليكم و رحمة الله و بركاته
كيفكم يا حلوين  ؟ ان شاء الله الكل
يكون بخير و صحة و سلامة

موضوعي اليوم عن رحلتي لمقاطعة بايرن بالمانيا
طبعا الي ناوي او ناوية تسافر ع المانيا و تحديداَ بايرن تتابع
موضوعي لأني رح حط أبرز معالم البايرن بهل الموضوع

و حابة نوه ع شي لاحظتو قبل ما اطلع هالرحلة انو لاحظت
كمية كبيرة من الناس عم تحكي انو المانيا مملة و مافيها اماكن
سياحية و فينكن تحكوا اني نوعاَ ما صدقت هالحكي من كتر
ما سمعتو بس بعد ما طلعت هالرحلة فعلاَ تغيرت نظرتي لألمانيا
180 درجة ! فعلاَ المانيا جميلة بشكل لا يوصف و فيها طبيعة
جنة الله على الأرض ! طبعاَ قد ما بحكي صدقوني الحكي مو
متل الشوف ابداَ  .

المانيا نفس ما تحكوا مخبية أسرار و نحن مهمتنا انو نكتشفا
و الأحلى انو فيها تاريخ عريق و كبير وين ما رحتوا بتلاقوا قصة
وراء مبنى او نهر او بحيرة او مجسم منحوت !

و الي انتبهتلو انو أغلب كنائس المانيا عمرها 200 سنة فما فوق
متخيلين عدد السنين ؟ و كيف قدروا يحافظوا على جودة المباني
لوقتنا هاد ؟

و الحقيقة الصادمة بالموضوع أنو هالكنائس كانت تحميهم
بالحروب العالمية من صلابة بناءها ! و ليومنا هاد
يعني لما تجوا و تشوفوا كنيسة عمرها 200 سنة
اكيد رح تفكروا انها مهترية بس لأ كتير قوية لأنها مصنوعة
من الحجر الخالص مو شي تاني حتى بتشوفوا بلوكات الحجر
و هن مصفوفين صف فيها لدرجة سألت حالي كم بلوكة
حجر مستخدمين لحتى بنوا هيك كنيسة ضخمة ؟

في كتير اسئلة بتجي ببالي و هاد الحلو بألمانيا دائما
بتخلي الواحد يتسائل و ينبهر مع اني شخصياً مو من
محبين التاريخ بس المانيا حببتني فيه

بس محتاجة 3 شغلات أساسية :

1- ميزانية من جيدة لممتازة
الميزانية مهمة لأن بعض الأماكن خاصتاَ بايرن تعتبر من اغلى المقاطعات بألمانيا
ف أسعارها مقارنةَ بباقي المقاطعات اغلى من ناحية الأكل او الأماكن الترفيهية
انا لاحظتها كوني ساكنة بأفقر مقاطعة  ضليت قارن الأسعار بين مقاطعتي
و بايرن , حسيت فعلاَ في فرق و لو كان ضئيل بس على الكترة رح تفرق معكن

كلما كانت الميزانية من جيدة لممتازة كلما انفتحتلكن اماكن كتيرة و رفاهية اكتر

2- توفر سيارة ( ما نعتمد ع المواصلات )
بعض الأماكن تحتاج سيارة لأنها محميات طبيعية و مابتوصلها المواصلات
مثلا لما بدكم تروحوا البحيرات محتاجة سيارة 100% و عملية أكتر لأن
رح تجيبوا معكن أغراض مثل مدة للأرض او أكل او مشاريب الخ نفس
ما تحكوا سيران و تقعدوا عندها ف بالمواصلات رح تكون لبكة الكم

على سبيل المثال : اخي استأجر سيارة 5 أيام و عمل جدول للأماكن الي مابينراح
عليها الا بالسيارة بهل ال 5 ايام و باقي ال 3 ايام الي بتكون بقلب ميونخ اعتمدنا
على المواصلات العامة ( و بشكل عام المواصلات العامة بقلب المدينة عملية
أكتر من السيارة بسبب قلة مواقف السيارات و الزحمة فما بنصح اي حدا يستخدم
السيارة بقلب المدينة )

ف بتقدروا تعملوا خطة كمان بالنسبة للمواصلات .

3- معرفة بالأماكن ( وجود خطة للأماكن قبل السفر )
في كتير ناس بيشتكوا من السياحة بالمانيا لأنها من وجهة نظري ما بتعمل دعايات سياحية
الها و لأماكنها ف في كتير ناس ما عندها علم ببعض الأماكن أو وين تروح ؟
مثلا لما اخي صار دليلنا السياحي شي مختلف تماماَ لما انا روح لحالي بما انو هو
ساكن هنيك فترة منيحة .

المهم ما رح طول عليكم , هالموضوع رح يعتبر قصة اكتر من عرض للصور
ان شاء الله تستمعوا معي  .

ملاحظة :

الهيدر من تصميم المبدعة @Tallarol استخدمت الهيدر الموجود بهل الموضوع هنا

الفهرس :

1- جبال الألب
2- الصدع
3- بحيرة الملك KÖNIGSSEE
4- مطعم الماني شعبي - عادات و تقاليد
5- بحيرة EIBSEE
6- ERDING THERME
7- OLYMPIAPARK حديقة اوليمبيا
8- Scloss Nymphenburg قصر لودفيغ الثاني
9- BMW TURM & BMW WELT برج بي ام دبليو و عالم بي ام دبليو
10- MARIENPLATZ
11- ODIONPLATZ
12- LANDSUHT

رد: السياحة في Bayern/Germanyالإثنين 2 يناير - 11:56:45

بالأول رح ابدا موضوعي بطلعتي على جبال الألب الي ما توقعت بيوم من الايام اني اطلع
عليهم او بالأحرى ما حلمت

هدول جبال الألب  طبعا بالحقيقة المنظر بيخطف القلب  و الهوا كتير كتير كتير عليل ان كان فوق
او حوالي المنطقة

اما هاد هو صدع صاير بجبل الألب نفسو و المي ( الدايبة من قمم الجبل من التلج ) مارة من جواتو
المنظر فعلاَ رهييب و الجو جوا كان باااااااارد بالرغم من حرارة الجو برا يعني لما تفوتوا جوا الجو جداَ بارد

اسمو بالألماني Schlucht - شلوخت

و لحتى توصلولوا لازم تطلعوا يا اما مشي على الأقدام ( تسلق ) للجبل و في طريق مٌخصص
بس ما بنصح ابداَ لانو طريق طويل كتير - إلا اذا حابين تعملوا مغامرة تسلق و تطلعوا و تنزلوا
مشي كمان في كتير ناس بتعمل هيك بس لأنو ماما كانت معنا و عمرا كبير و ماخرج نطلعا هالطلعة

أو انكم تستخدموا التلفريك و تنزلوا على الأقدام ( نفس ما عملنا ) بس كمان انهلكنا

و هون صور أوضح للصدع اذا حابين تشوفوها  هنا

اما هي البحيرة المفروض يصنفوها من العجائب السبعة من جمالها شي مو بالخيال و ربي
مع اني شخصياَ ما بحب البحيرات لأن كلما شوف بحيرة بتكون وسخة و فيها طحالب و لونها
أخضر الا هي كانت المي تبعيتها صااااافية نفس ما نحكي بالانجليزي CRYSTAL CLEAR
و هي البحيرة نتيجة ذوبان ثلوج جبال الألب

و من كتر ما هي كبيرة فكرتها بحر لأن ما كنت شوف نهايتها  !

انا ما توقعت بيوم من الأيام اسبح ببحيرة بس سبحت فيها و كان منظر خيالي
الواحد يسبح ووراه جبال الالب او بالاحرى انو نسبح بمي EVIAN الأصلية

اسم البحيرة على شكلها KÖNIGSSEE بحيرة الملك
معلم مشهور لازم الكل يروح عليه اذا بيوم من الأيام اجا على بايرن

هاد مطعم كان جمب المنطقة مطعم الماني تقاليدي النادلين البنات بيلبسوا
لباسهم التقليدي اسمو DRINDL < اضغطوا على الكلمة لحتى تشوفوا كيف
شكل لباسهم التقليدي  طبعاَ هاللباس حصراَ لمقاطعة بايرن

و الربطة الموجودة على خصر البنت الها عدة معاني :

السياحة في Bayern/Germany At16571031084211

1- اذا كانت الربطة على اليمين : مرتبطة أو متزوجة
2- اذا كانت الربطة على اليسار : عزباء او غير مرتبطة
3- اذا كانت الربطة في المنتصف : فهي عذراء
4- اذا كانت الربطة في الخلف : فهي أرملة

و الشباب بيلبسوا LEDERHOSE

الي حبيتو كتير بهل المقاطعة انو عندن فخر بتقاليدهم عكس باقي
المقاطعات , انا رحت لكذا مقاطعة و مطعم الماني بس ما شفتن
لابسين لبس تقليدي الا بالبايرن هالشي عنجد حبيتو فيهن

المهم انو اخدت فكرة كتير عميقة عن اكلن الشعبي و طلع فعلاَ
عندن مطبخ عكس ما الكل بيحكي انو المطبخ الالماني معدوم
أو بس كارتوفل ( بطاطا ) و لحم

المشكلة انو هالحكي طالع من العرب هون و لأني مو ستايلهم
بالأكل ف بيحكوا بكل بساطة المانيا ما عندها مطبخ و هالشي خطأ

صحيح انو افخم اكلة عندهم اسمها schweinshaxe لازم يكون
اللحم المستخدم خنزير بس هاد مو يعني اذا شي ما باكلو
يعني اعدم مطبخ طويل عريض بسبب هالشي

و أكلهم طيب كمان كتير طبعاَ عندهم أطباق مافيها لحم خنزير
في من لحم الغزال أو البقر أو الدجاج لأن متل مافي مننا ما بياكل
لحم خنزير حتى في المان ما بياكلوه إن كان صحياَ او مشان الفخامة
لان بألمانيا بيعتمدوه بسبب رخصه بشكل عام مقارنة بباقي اللحوم

هي بحيرة اسمها EIBSEE - ايب سي

كتييييييييييير كتييييييييييير حلوة بصراحة انا حبيتها اكتر من بحيرة الملك لسبب واحد فقط
انو بهل البحيرة كان في شط يعني بيقدر الواحد يسبح بسهولة اما بحيرة الملك ف كانت
الصخور دار مدارها و أغصان الشجر مكسرة ف لما بدك تسبح رح تلاقي صعوبة

عدا عن هيك التنين أحلى من بعض و التنين المي تبعيتهم صااااااافية لدرجة كنت شوف أرض
البحيرة  و هي كبيرة و من كبرها الواحد ما بشوف نهايتها

و هاد غير البط الي متعود ع البشر بيجي عندك بيحكيلك واك واك بدي اكل

طبعاَ حابة نوه انو في مخالفة كبيرة اذا طعميتوا البط خبز لأنو مضر الهم ممكن تطعموهم عنب

اما هاد المكان اسمو ERDING THERME و سموه على اسم المنطقة الموجود فيها اسمها ERDING

هاد تيرما بمعنى مجمع مسابح ( ان كانت املاح معدينة او مسابح عادية ) و غير مجموعة الساونا و البخار و العاب
مائية و مكان استجمام و نوم و كل شي هاد معنى كلمة تيرما

هاد يعتبر اكبر تيرما بالعالم متخيلين اديش رح يكون كبير ؟

للأسف ماعندي صورة الا هي بس شوفوا هون لأن في أماكن ممنوع التصوير
و أماكن مسموح بس من كتر البسط ما فكرت صور

المهم رح احكيلكم عن هالمكان شوي , اكتر شي عجبني المسابح المعدنية

في عندن مسابح كتيرة انا انصدمت من كترتها , مسبح بالملح , مسبح للصوديوم
مسبح للكالسيوم , مسبح فيه مي كبريتية الخ و هالمسابح كتيرة مفيدة لازم الواحد
يقعد بكل مسبح 10 دقايق و يعير الساعة لأنو صغير مشان محدا يطول فيه
و يعطي دور للي بعدو

هاد بمجرد تقعد فيه 10 دقايق كل هالمعادن بيمتصها الجلد متخيلين اديش مفيد ؟
هاد غير فوائدو الصحية كمان فيه فوائد طبية

و هاد غير حمامات البخارية كل حمام فيه نكهة مختلفة مثلا عندكن حمام بالستايل الروماني
هاد عنجد انصدمت فيه  و حمامات فيهم نباتات طبية و مع الحرارة فوائدها بيمتصها
الجسم ان كان من خلال الجلد او من خلال الشم

و هاد غير انو كل ساعتين عندن ماسكات للوجه مجانية اول شي فكرت بس منظر بس لما
جربت واحد حرق ابو وجهي حرق  انو اديشو قوي و اخر اليوم جربت ماسكين صار وجهي
يلق لق

و شي كمان انو في مسبح خارجي كبيييييييييييير و من كبرو فيه مكان بقدموا فيه مشروبات باردة
و بشغل اغاني بصوت عالي , الواحد بيشرب عصير و بيقعد يستمتع بالأغاني

وورا في مسرح كبير مشان يستضيفوا مغنيين يعني بيعملوا حفلة بنص المسبح

يعني هالمكان شغل خياالي الي بحب يروح سياحة لبايرن لازم يزور هالمكان

ما رح انسى انو في أماكن المخصصة للراحة و النوم و في اضاءة لونها احمر

بتسلطها عليك بتعطيك تدفئة شي خياااالي

و في عندهم فندقين جوا المحل نفسو , لان في ناس بباتوا هنيك

هاد موقع المكان الرسمي

فديو بورجيكم المكان

السياحة في Bayern/Germany At165702597255413

اما هون حديقة اولومبيا OLYMPIAPARK

من أشهر الحدائق الموجودة ببايرن بسبب قدمها و سموها بهل الإسم لانوا كانوا يعملوا
الألعاب الاولومبية هنيك و لغوها و حولوها لحديقة و سموها بهل الإسم و الحديقة
كبيرة كبيرة كبيرة بشكل لا يوصف و نضيفة نضافة مو طبيعية بنصح كل حدا يروح عليها

و الأحلى محل ما انا مصورة في مكان عالي ببين برج BMW الي صممتو زٌهى حديد
يعني هنيك التقاط الصور شي ولا احلى

هون مكان ما كانوا تيليتابيز يصوروا

فديو بورجيكم جمال الحديقة

رد: السياحة في Bayern/Germanyالإثنين 2 يناير - 11:57:22

قصر LUDWIG ll

اسم المكان

Scloss Nymphenburg

هالمكان صورتو اكتر شي فديوات لهل السبب ما عندي غير هالصورة

قصة هالقصر :

انو كان في ملك اسمو لودفيك الثاني Ludwig ll و كان هالقصر الو
طبعاَ ما كان قصرو الأساسي , هاد يعتبر قصر صيفي الو بصيف فيه
لما بدو يطلع رحلة إستجمام و كان عندو كتير قصور تانية و هاد منها

و كان هالملك بحب البنات كتير و كان ع أيامو يخلي النحاتين ينحتوا
أجمل البنات ع شكل تماثيل ( متل مو شايفين بالصورة في تماثيل
موزعة دار مدار الحديثة الداخلية ) و من خلال هالتماثيل منتعرف
على الجمال الالماني القديم كيف كان يفتخر فيه لأنو كان ملك
و أختار أجمل البنات بوقتو .

الغريب بالموضوع انو كنت شوف ورد ع بعض التماثيل
نفس ما نروح ع قبر ميت و نحط ورد ع قبرو

كأنو في حدا كان بيعرف هالبنات شخصياَ لحتى يحط
على تمثالها ورد - هالشي فعلاَ استغربتو -

رح احكيلكم نبذة عن هالحاكم :

كان لودفيغ الثاني ملك بافاريا في نهاية القرن التاسع عشر. لكنه لم يكن ملكًا عاديًا. كان لودفيج ملكًا في وقت
كانت هناك حروب عديدة في أوروبا. لكن لودفيج لم يحب الحروب. أحب الفن والموسيقى وفضل العيش في
عالم أحلامه أو عالم القصص الخيالية. من أجل العيش في عالمه الخيالي ، كان لديه العديد من القصور الرائعة
التي تم بناؤها والتي يمكن أن يزورها. هذا هو السبب في أنه يطلق عليه أيضًا اسم ملك الحكاية الخيالية.
لم يهتم لودفيج بالسياسة. لذلك أعلن وزراؤه أنه مجنون وسجن. توفي لودفيج عن عمر يناهز الأربعين
عامًا. تم العثور عليه ميتًا في البحيرة ، وما زال موته لغزًا حتى يومنا هذا.

فديو مٌختصر عن القصر - شي خيالي

لا تنسوا تضيفوا للائحة الأماكن الي لازم تزوروها

هلأ منجي للمعلم السياحي الشهير برج البي ام دبليو الي صممتو زٌهى حديد

طبعاَ كان حلم من أحلامي اني شوفو بعيوني و ما صدقت اني شفتو

جمالو بالحقيقة مو طبيعي مو نفس الصور أبداَ  !

طبعا و انا عم شوفو تمنيت كون عراقية لأفتخر بهل القطعة الفنية  !

و مع هيك انا افتخرت كوني عربية

و جمبو بالضبط متحف ال BMW هالمتحف بنزلوا فيها اخر اخبار هالشركة

اي شي جديد بنزلوه هون قبل ما يوزعوه ع العالم متخيلين اديش واو  !!

يعني الصور الي رح اعرضها عليكم هلأ هي صور حصرية و مو موجودة هالسيارات

بالعالم لسا , بمعنى آخر نازلة جديد  !

هاد مدخل المتحف

BMW WELT عالم بي ام دبليو

رد: السياحة في Bayern/Germanyالإثنين 2 يناير - 11:57:56

هلأ نكحل عيونا بالجمال المعماري الموجود بميونخ

قطعة فنية !!

^ بالنسبة لهل الصورة صار معي موقف بضحك

لما وصلنا مارين بلاتز طلعنا بهل الدرج الكهربائي الموجود بالصورة
و متل مانكن شايفين انو لما تطلعوا فيه رح تكون الكنيسة وراكن
فلما طلعت انا و اختي بنفس الوقت التفتنا لورا و شفنا مجسم
كبيير و عتييق و تاريخي و طويييل

حكينا بنفس الوقت واااااااااااااااااااااااو بالضبط هيك
و شفتوا لما تشوفوا شي كتيير حلو و بؤبؤ العين بيكبر كتير ؟
نحن هيك عيونا كانت  !!!

طبعاَ كان ورانا واحد سمعنا و فرط ضحك
عرف انو اول مرة نحن منجي

ووقتا حسيت اني بألمانيا حرفياَ  !!
ستايل القوث الأصلي
اجمل كنيسة على الإطلاق جمالها بيخطف الأنظار

اسم هالمنطقة Marienplatz منطقة مشهورة لكل الي بدن يجوا سياحة لبايرن

^ بيحكوا انو هتل*ر كان يلقي خطابات بهل الساحة و على يسار الصورة موجود مسرح كبير للإلقاء

و هالمنطقة اسمها Odionplatz موجود فيها كل الماركات العالمية التقيلة نفس ديور و شانيل الخ
افخم شارع بكل المانيا

و هون سوق ميونخ الرئيسي نفس ما تقولوا DOWNTOWN MUNICH

^ انا هون ما صدقت لما شفت محل نادي بايرن قلت لازم لازم صورو

و هي صور من مدينة اسمها landstuhl موجودة ببايرن  شوفوا ما احلاها

^ تقولوا البيوت ملونينهم بأقلام تلوين
كتير كتير لفتوا نظري الوان البيوت

و رح اختتم الموضوع مع هالصورة اخدتها من منيو لمطعم و عجبتني المقولة مكتوب فيها :

الفلاسفة موجودين بكثرة بزجاجة نبيذ واحدة أكتر من كل الكتب بالعالم
ابتداءاَ من الزجاجة الثانية ستصبح من نفسك فيلسوف !

دٌمتم بخير